Heb 6 | BEF | STEP | Ya'mu ya'ma lali ya hu'ehibe luto Kilisitohi kaga'amofihi biha'a hapi fi'ehinamofitoga ya'ma melenogoti ni'inogo ka'amofihi megesa'a lolito tito nebinogo bebe sose kaga lulatanamofihi kapo'a ya'ma moloto mino lito buto bilune. Mono kamofihi luga'a ya'ma tafa'a nomoloto futu'amofihi foya henabe luto aku'i hapi filune? Komopati lemeha'a li gelehe hilatana to Hu'mamofihi keheli emilata nohune.

Hebrews 6

1 Ya'mu ya'ma lali ya hu'ehibe luto Kilisitohi kaga'amofihi biha'a hapi fi'ehinamofitoga ya'ma melenogoti ni'inogo ka'amofihi megesa'a lolito tito nebinogo bebe sose kaga lulatanamofihi kapo'a ya'ma moloto mino lito buto bilune. Mono kamofihi luga'a ya'ma tafa'a nomoloto futu'amofihi foya henabe luto aku'i hapi filune? Komopati lemeha'a li gelehe hilatana to Hu'mamofihi keheli emilata nohune. 2 To mono nagami'i fololata nohuta ka'a to lataha'anilo layahi moloto lusa gilata nohuta to filise'naguti ho tise'na to foipana lolo hu epoloto ka foya lilata nohuta buba buba huse'namofihi kaga'a hena'mu aku'i yamofihi lito hapi filune? 3 Hu'mau keheli'ehinogo lali ho tito abilune luto kohe toto kapo lamana'agu malalune.

4 To mono ka keheli'ahana bona'i luga'amagi nehinogo Hu'mamofihi fana meha'auba komopa'ani le'mo besa lago to kokulumaguti nose'na nete enele'mo'ehina to Sikalafu'i mone'i li'ahana enali yanamofihi enemegesa hi emite minenogomo hena hinogo aku'i enele'mo gelehe huto tiligi salune? 5 To enali Hu'mamofihi ka'a hetofana ni'ibe li'ahana to alihi huto hilina kana'amofihi ule'ale huse'namofihi amuya'a laga'a akeheli'ahana. 6 Enali ya hite minete alihi aku'i ya'ma asaga'i li he'mite enemegesa hu emi'ehilana yanamagi Hu'mamofihi pana'a aku'i malipu yafalo hete boana'magihi enubulo le'mo yege fise'na kalana'i mele etalana kehelilina ni'ibe. Ya'ma bona'i komopa'ani aku'i enele'mo gelehe hinogo tiligi solata hilinamofihi mone meni'ibe.

7 Me'i monetoga ko'uba kana'amu kana'amu iba iba huto minoto le'mo gefa gefa noigo bona'magi foya lite nose'na he kelelata nehago nose'na li huto huto hu epilata nohinamofihi ya'ma Hu'mau lusa'amofihi legeya'a huto hulata nohibe. 8 To me'i monetoga foyaguti kifina to kifi kaso'a hiti nasanago mino baga ilata nohina'mu yabe luto ka me'i lolo huto minana'mu Hu'mau gumi'i halifi mehalibe ai foya'a yabe. To ana metoga logouba lalube'mu hibe. Ya'ma fono kaguti me kumu lu'ohuna yamofihi me'mofi kumu menolube. Bona'magi kumu lu moloto nolunagi kehelilo.

9 Nalalu'nigitabe, nani ka noluna ya'ma lenali le'mo tiligi salabe luto keheli'ohuto menolube. Lenubuto bise nasana yamofihi legeya'a lenalitoga huto holito buto minalibe luto keheli'ohuta nolube. 10 Hu'mau ai'a mone li sibina huto ya huto menohibe. Lenali ai kumu yabe lite foya'a lite komopatini minalanamofihi lamana'a yamofihi Kilisitohi yagapana'a enele'mo bati hite lenemehi emite enehe'malata nehanamo yamofihi ai'a yana'mu ekesu mehalina'mu yabe. 11 Lenali kumu ya hilabe luto nolube. Lenali asaga'naloga moneko legege hite keta mehuse hite minenogo lele'mo hetofa hilina nasana ya hilune lite fifa ite lenegekesagu melete mine lite netinogo kana'a su halina yalo nehetilabe. 12 To lenali fa'mene fuli meminese bona'i luga'amagi keheli ule'ale hi'ehite to kosele'i melenehenogo geba hilete minete ana'ina'mu lu molo lepolo'ehina yamofihi lilata nehana bona'magi bilata nehana kapo analo enigigusa ite bilabe luto nolube.

Hu'mau kaga lu molo'ehina ka'a

13 Koyapa'i enalitogati mone Abalahahi Hu'mau kaga lu eto'ehina bo mone tito mino'ehinamofihi gi'alo lu laga hilube luto keheli'ehinaya sa huloto sipi bomofihi gi'a mone be meligilibe luto ai'asigo gi'alo lu hetofa huto lu molo eto'ehina. 14 Lu moloto lu etoto ma luto lu'ehina:Nani'ni ya'ma lusa aku'i gi ketalube'mu nohube. Ya huloto kai yagapanaka babu luto li futili huto li huto hu kimiluna'mu yabe. 15 To Abalahahi Hu'mau lu eto'ehina kaga'mu yabe luto kosele'i mehago geba huto mino lito buto legeya'a ligo ai'na lolo hu'ehina. 16 Bona'magita yahi tito bo mone'mofihi gobisalo le'mo ule'ale huto lu laga huse ka nolinogoti lalitogati tito mino'ehina bomofihi gi'alo lu laga huto o'e lulatana yamofihi huto mehilina'mu yabe. 17 Yanamofihi Hu'mau ai'a bona'i lu molo epolo'ehina yamofihi Hu'mau kenetufa'a le'mo gelehe huto fato ka lilifihe? lite enegekesa loemo keheli lalabe luto komopa'atu keheli hetofa higo lu'ehina. Anamofihi hapa'a li huto hilube luto lu molo epolo'ehina nasanamofihi ka'amofihi gupisalo le'mo hetofa huto lu laga huse kaga ya'ma molo emi'ehina. 18 Hu'ma ai faga faga ka'a meni'ina bouba li hetofa huto ka'a loemo lu'ehina ya'ma li ho tito limilago ai'a maha'aluga mino fala ki'ohuta lali ana'ina lele'mo keta mehuse lubuto bi'ehina yamofihi legeya'amu fifa ito li pili koto amuya moloto lilune luto kehelito minalune. 19 Lele'mo babahi hu'ehina'mu luto fifa ito geba huto minalatauba komopatimofihi lukesati lolo hinogo nohinogoti kokulumalugu mono nohi komopa'aluga katatu'i hekini lo'ehina ya'ma nonugu ai kapo li hokolo higo Hu'mamofihi gobisalo lele'moto tilata nohibe. 20 Lali kumu yabe luto le'mo kohe to leto'ehina bo, Yesu ai yamofihi analo lele'mo kohe to lito buto sipi mono nopofihi komopa'agu bu neheti'ehina ai Melekisitekihi naga'a suhi huto lali'i mamufa gi emilata bo lolo huloto mino lito buto asaga kana'amu kana'amu bigo minalube'mu nohibe.